TORA XELATA TE/Şêro Dalînî


TORA XELATA TE/Şêro Dalînî


Tora xelata te bû

Girî di hembêza min de

Şor dikir

Têkçûnên beravêtî sêwî

Û gêj diman

Ji gotinên xwe re dibûme kurk

Tora xelata te bû

Zarokekî sêwî li gundan

Bê mal û parsekê ken kirim

Laşekî hêrifî me

Di bendemana te de,

Di kavilên çareyên min

Yên sar de

Tenê hêvîyeke nuh biçîne

Awireke barkirî

Sozeke derew vede

Vede û dîsa here

Here

Û destekî din bi min

Biguvêşe

Yekî din di asoyên şînîyê de

Dîl bike

Ji gavên nuh bêweş bike

Ji xwestekên terr biavêje

Ji ezmanê gula sor

Binax bike,

Ez ê bextê xwe yê reş

Ji milên bêhişîyê biavêjim

Û ji

Te

Re

Bibêjim:

Ez siwarê xewneke rijiyayî me

Di gewdeyê gola xwe ya sor de

Digevizim

Ez pakrewanekî neveşartî me, çi bikim?

Keysa kela min

Li finasên sîpetîya te nayê,

Ev dever ne qada bazirgana ye;

Ez gotinên xwe nafiroşim,

Dev ji kenê bêhişîyê berde

Û

Were

Were di gerdena vê sibatê de

Di zîvînîya heyva beloq de

Li pişkokên şaxên min

Yên kat bigere,

Te çend ji yên ku

Ji temberîka te re

Xewnan dirêsin

Xistine nîşana xwestekên

Xwe yên har de

Te li gorî xwe

Çi xewn bijartîye û hûnandîye!!?

Ez ê çawa sînorên şînîyên xwe

Yên guneh

Bi gavên xilûxavî

Li şûna xwe bihêlim

Dikim ku xwe ji mîratên şevên

Te yên kal

Dîl bikim

Guhdarîya giregira

Gera rojên giran bikim

Û stêrên şevên te yên tal

Li ser gewdeyê xwe pûç bikim

Û bi razîbûnê bipêjim,

Xwe nespêre xewa payîzê

Û

Bilez were

Were

Ji qurçika dilê min

Bîna te tê.

Ji tîna awirên wê xelkîno

Dibim mij

Û tevlîhev dibim

Dibim dû

Û nema bi ser

Rêya vegerê ve dibim

Û dibim sitraneke bi şewat jî.

This site was built using